راني مكوية نهار لول ورا عرسي الناس تصبح تحوس وتصبح فرحانة وتتمعشق هو راح يخدم شرالي قضيان وراح جاو دارهم من وراه قعدو ناضو لواساتي طيبو قهوة حطو معايا جمعو قالولي وينو موح قتلهم راح للخدمة قالولي موح خاطيه هد صوالح مهوش من تاع ضرك عقلية زمان برك شورو جا العشية من الخدمة وجدتلو دوش دوش كمل خرج تقهوة وقعدت مقابلاتو كاش مايهدر ولا كاش مايجبد سوجي قعد يتقهوة ولاهي فتلفون وانا نشوف معاه من بعد قالي نتي مين تخرجي واش تلبسي ممممم قتلو نلبس عادي حجاب وغوب مستورة قالي نو علاش عليك الغمة هدي أنا ستغربت قتلو كيفاش مفهمتش قالي اطط قعد يشوف فتلفون من بعد ورالي فوطو وحدة بشعرها عادي مطلوڤ ولابسة سروال قتلو واش هدا قالي نحبك تلبسي هكدا قتلو ايه نلبسلك نورمال هنا فدار مي مجبتش معايا لازم نشري قالي ننن مشي لدار لازم نخرجو مع بعض ونتي تلبسي هكدا نحب شعرك يبان و وتلبسيلي ديغوب شابين وسراويل و عفايس بزااف قتلو مهبول نت جابلي ربي هبلت ولا شبيك قالي انا لينقولك واش تلبسي مشي كيما يحب خاطرك نتي قتلو غير هدي ليفوتها والله متصرا قالي مالا عيطي لماليك يجو يدوك...يتبع
عليكم التفاعل وعليا باقي القصة خلولي تعليق نرجعكم كامل🤍
#viral #قصص #fyp
#الحلقة_2
قتلو نت مريض جابلي ربي ماراكش صاحي كيعاد خصك الطفلة ليتعري وتبين شعرها واش جابك ليا قالي : المكتوب جابني قتلو : نت تعرف للمكتوب نت نت ربي ومتعرفوش عطاني كف عينية حوالو زادني زاوج فشلني قالي اسمعي تديري واش نقولك انا ولا ارجعي لداركم قتلو غير ذل تاع دارنا ولا معيشة مع رخيس كيفك حكمني من شعري وبدا يضرب فيا بالكفوف برجليه قتلني وخرج وخلاني انا صبن فشلت فبلاصتي وقعدت نتحسر ونتفكر واش كنت عايشة فدارنا قلت رحمتك يادارنا ولا هد شي كيفاش نرجع لدارنا من يومي الأول بابا وعمومي يذب**حوني كيفاش نخدعت فيه وحسبتو عاقل يخي ختو قاتلي عقليتو تاع بكري كيفاش رآه يخدم فهد تخمام نعيط لدارنا ؟؟؟!!! واش نقولهم زوجتوني برخيس
بقيت قاعدة فالارض نخمم نخمم نخمم حتى رقدت بلاما نعبا حتى حليت عينية لقيتها ظلمة وهو مزال يجي نضت وجسمي مكسر تكسار نضت تفكرت واش صرا قعدت نبكي بكيت بكيت خرجت ڤاع واش كان فقلبي بأعلى صوت وحدي من بعد دخلت لبلاصتي نستنا فيه يجي نقولو عطيني تلفون نعيط لدارنا ونروح ليهم يقتلوني هوما ومانموت على يد هد البنادم وحد ساعة دخل محمد وهو جايب زوج ساشيات وحدة سقايط و وحدة فيها جاج وفريت دخل عندي قالي نوضي تاكلي مبغيتش نرد عليه قالي قتلك نوضي قتلو عطيني تلفون نعيط لدارنا قالي ترجعي لداركم ؟؟ قتلو ايه قالي هاوليك تلفون هاكي قتلو ديرلي نمرو تاع بابا قالي اصبري نعيط لبويا ونقولو يعطيهولي...
#جمجو كامل الاجزاء
#الحلقة_3
عيط لباباه جاب رقم تاع بابا دارو فتلفون وقالي هاكي غير صونا قتلو الو واه بابا قالي واه شكون قتلو انا امال بنتك قالي آاااهلا بنتي واش حوالك كيراكي كيراه موح
في ديك دقيقة كيقالي بنتي حسيت خدمي دخل فقلبي تخلعت بابا قالي بنتي قنطت شفتو مين تكون تبكو وتحكو فتلفون كيفاش تولو تأتأو و تتلفلكم الهدرة قتلو بابا توحشتكم واش راكم وانا نشهڤ قالي علاش راكي تبكي قتله والو توحشتكم وصاي قالي شاوالا غير نهار بعد صاي قالي هليكي نفوتلك مك
ماما : آلو واه أمال كيراكي كيراهي بنتي كيصبحتي غاية يادرة بنتي تهنيتي
قتلها حمدالله ماما ني غاية واه ماما تهنيت قتلها ماما بغيت نقولك حاجة وسقسي بابا قاتلي واش هي
قتلها محمد قالي كيتخرجي نحي حجابك متديريهش قاتلي شاهوا شاهو تڤلعي حجابك هبلتي نتي سمعت بابا قالها واش من حجاب تڤلعو فكلها تلفون وقالي شاباغية تديري عاودي عاودي
قتله : محمد قالي نحي الخمار متزيديش تديريه ڤاع ولبسي لينقولك عليه فكلي محمد تلفون من يدي وقالو : الو عمي واش راك قالو بابا واش راهي تقول امال صح
قالو : اسمع عمي إذا ماراكش حاب بنتك ترجعلك ليلة ونطلڤهالك اعتارضو هدي مرتي وتدير واش نقول لها انا ونوعدك مايخصها والو نديرلها فدنيا دنيتين.. ...يتبع
#جمجو و خلو تعليق
#الحلقة_4
نوعدك مايخصها والو نعيشها كالأميرة
قالو بابا ماتجيبهاش يديرو الناس الهدرة فيها وفينا اصبر نخمم ونعاود نعيطلك كوبا
قالي شفتي باباك رآه باغي يخمم شفتي كون جا يحبك والله غير هو ليجي يديك وضحك ضحكة لحد ضك نسمعها فوذنيا قعد فطابلة يتعشا ويقولي باباك رآه يخمم هههههههه ويضحك
الغدوة صباح عيط بابا قالو راهي مرتك تدير ليتقولها عليه بصح راهي فأمانتك وإذا راك حابها تكون بلا حجاب كيتجي للفيلاج تاعنا ديرهولها ومادابيك متجيبهاش بزاف بحكم نسكنو في ولاية وحدة ولكن منطقتين بعاد على بعض
قالو متجيبهاش بزااف وبعدها على فيلاجنا وتهلا فروحك وتهلا فيها تاني وكوبا قالي امال يخي سمعتي واش قال لازم تساعفيني انا والله غير نعيشك كالملكة مايخصك والو قعدت فبلاصتي نبكي مابكيتش على جال محمد بكيت على بابا لي همو الوحيد هدرة الناس صبن انا وليت عايشة حياتي عادي مي كينخرج نخرج بلا حجاب ونلبس عادي محتشم ولكن منلبش الحجاب الصراحة كان مقلشني يديني نشري كل خير وكل سمانة عند لاكوافاز ندير نيتواياج ويقولي نحب ضفارتيك طوال وشبين ونحبهم ملونين نحب شفارتيك طوال نحب حواجبك مستفين مرات نحسو واحد مريض في عقلو مرة كنا قاعدين قتلو بغيت نسقسيك قالي واش قتلو على واش هد شي كامل قولي علاش البعد على ربي عاجبك ؟؟
قالي : انا ما تهمني حتى حاجة من غير تكون مرتي بوبية وكلش فيها شباب
.... يتبع...
#جمجو الجزء
#الحلقة_5
وترجعي كالبوبية والله غير ليبغيتيها نجيبهالك قالي راني نخلصلك في تلفون شباب وراح نفتحلك فيه فايسبوك تيك توك انستغرام وحطي فيه تصاورك وحطي كلش فيه قتلو يخي راك عارف بلي انا تلفون منعرفلوش كااامل وجامي لاكان عندي تلفون سيرتو هدو الكبار
قالي : معليش والله نعلمك مهم تديري واش نقولك انا برك
انا صراحة كان فخاطري تلفون كاي طفلة نحب يكون عندي تلفون فرحت بزااف كيقالي رآح نجيبلك تلفون بصح من جيهة مفهمتش وش يقصدك بفوطواتي كاين يهدر بطريقة تقول مريض بيا يحب الجمال المصطنع لازم دائما ليفوسيل وضفاراتي يكونو شبين رجليا شابين نيتواياج كل سمانة ليبارفا ليجيبهملي بلا حساب يظل لاسق فيا يظل يصور فيا كالمهبول
فاتت سمانتين وحنا هاك حتى جا نهار وين جابلي تلفون آيفون فرحت بيه واخيرا عندي تلفون كيف لبنات فرحت من قلبي بيه وقعدنا هداك نهار كامل مع بعض فيه نتيليشارجيو يوريلي كيفاش ندخل واش ندير يعلم فيا كيفاش نفتح ليكونط يوريلي فليزابليكاسيو فتح كونط باسمي فالانستا ودار فوطو تعي قتلو واش راح تدير قالي نفتحلك بانستڤرام ليك حطي صوالح لينشريهلك فيه خدمي فيديوهات ديري سوطريات صوري ضفارتيك
هدا انسان عادي؟؟؟! اسك هدا انسان عادى ؟؟!
انسان حاب ينشر مرتو فليغيزو زوسيو..يتبع
#جمجو الجزء
#الحلقة_6
حاب ينشرني فمواقع تواصل الاجتماعي
انا بقيت ساكتة ونشوف من بعد دخل لتيك توك فتحلي كونط نفس شي فوطو تعي قالي هدا كل يوم ديري فيديو على واش تديري من صباح العشية كيفاش تخدمي شغل وريلهم مكياج قشك المهم يطلع الكونط قتلو مي راك عارف بلي انا خاطيني ومانعرفش لهد صوالح قالي عادي انا نعلمك راح نوريلك كنا كل مرة نباتو على تلفون سهرانين يوريلي كيفاش نخدم بيه و واش ندير نشفالها أول فيديو تشهرت بيه وين كتبت انا 17 وزوجي 37 اهااااه كمية التعليقات والمتابعين والقذف وبعد رجعت كينحط فيديو على الميناج وكلش رجع الكونط كل يوم يطلع شوية كل يوم
وكان مانع عليا منعا باتا اني نحمل كان يشريلي الكاشي باش مانحملش يقولي نعيش حياتي كامل معاك هكدا فات عام وحنا هاك
رجع عندي كونط تاع تيك توك رجعت نحبو منحبش نخرج منو نظل نشارك في يومياتي معاهم ونحب لبنات مين يكومونتيولي ودارنا رحت زوج خطىرات وماكانوش يخلوني نطول عندهم بلخف يليكيدوني
جا عندي محمد قالي جايبلك خبر شباب قتلو هيه
قالي لايمت دراهم راح نروحو لترك نديك تديري عملية للأرد**اف وتخدمي لاطاي تعك قتلو راك من نيتك راك في عقلك هبلت نت واقيل قالي علاش راني حابك تكوني زلة
قتلو نحيتلي الحجاب قلنا معليش قتلي اخدمي ضفارتيك الصلاة راحت صح سكتنا حواجب يتلقطو ليفوسيل على العام جلد تاعي حرقتولي بليزر ألبسة وتعراش فبحورات صح مي نوصل ندير عملية صبن هبلت نت وفت الحدود قالي اسمعي اطفلة راكي عندي وفداري ولينقول عليها هي ليتحضر بغيتي ولا كرهتي واذا معجبكش الحال اخرجي ودبري على روحك متقعديش عندي وبابا موحال يستقبلك عندو ودارنا مايدخلوكش كون ماتقولش انا اوك ودبري وين تروحي. ا وك آمالا غير بدي توجدي في روحك سمانة الجاية نعطوها بغيتي ولا كرهتي
بقيت فبلاصة مخلوعة فهد شي ليصاري معايا واش هدا. ...يتبع
ماتنساوش تفاعلو مع القصة ( جيم + تعليق
#الحاقة_7 و الاخيرة
المهم لا علينا سكت كيف العادة بصح كينشوف هداك الدلال والقلاش ننسا كلش مايهمنيش نقول بالاك مين معشتش صغري ربي راه يعوض فيا
من بعد نقول ننن ربي يعوضني بشي لييرضا عليه مشي بالبعد على الصلاة و نحي الحجاب 😭😭😭 جازت سمانة رحنا لترك قعدنا وحدة 15 يوم 20 يوم درت شفط دهون وكبرت تريـ** ماتي وحد الالم يالبنات الله لا يشوفكم المهم رجعت إنسانة مركبة وخلاص رجعنا للبلاد
فات وحد شهر هكدا رجعت عادي لحياتي وتلفون وتيك توك حتى رجع يطلب مني نبين لاطاي باش نجيب مشاهدات بزاف على هاك مي هداك نهار انا مسكتلوش خلاااص مرڤها مي زرڤني بضرب قتلني قتلني بضرب وارغمني على رقص وفتح لايفات انا تالمو ليصاي مقدرتلوش لميت قشي اكل قالي وين بيها قتلو يخي نت قتلي إذا معجبكش الحال اخرجي من داري ودبري على روحك قالي هيه قتلو مالا باي راح ندبر على روحي قالي ستني ستني تدبري على روحك ايه مي هاتي تلفوني و هاتي صوالحي اكل فرز كامل صوالحو كنت مخبية شوية دراهم داهملي وقالي ايا طيري برى انا فشلت من ركابية ذهبي مزيا كنت دايرة شوية في يدي و وذنيا ومانتبهلهمش وخرجت حكمت طريق غير نمشي ونبكي نمشي ونبكي شافوني زوج طفلات ربي يحفظهم ماننساش خيرهم طول حياتي 🥺 قالولي شبيك قعدت نبكي نبكي حدي جابولي الماء شربوني وقالولي مالكي ختي احكي شبيك قتلهم دبرولي وين نرقد عيشكم طردت من دار قالولي ماتتقلقيش وكل وحدة فيهم تقول لختها انا نديها عندي داتني وحدة منهم وبتنا ليل كامل نحكيلها على حياتي و واش صرا معايا اطفلة حكات اخوها و باباها عليا وكلوني ستروني رجعت غطيت شعري باباها داني لجمعية فيها نساء تاني يباتو فيها ليمعندوش ملجأ دبرلي خدمة فيها ومنها نرقد تم تاني جا راجلي يحوس عليا وانا كيشفتو نضت نتوغ حدي ونديرلو فنش باش يتلايمو عليه ودابزوه هداك نهار وبابات ويمات طفلة وقفو معايا حتى ليطلقت رحت ليما وبابا مي كانو يرجعوني وضك ني نخدم ونرقد فنفس المكان عرض عليا واحد نتزوج بيه تم مي انا رفضت رفض قاطع ومزالني نخدم ضك ربي يفرج عليا وعلى كل مؤمن رآه يحاول فيا باش نقبل بيه مي صاي كرهت حاجة اسمها زواج 🥺مع السلامة ربي يحفظكم
خلولي رايكم في القصة و #جمجو🤍