#قصة_خفيفة
انا اسمي امال من الشرق الجزائري شابة خمرية او عينيا كبار او شوربي منفخين او شعري طويل يعيطولي مولات شعر جذاب بلا عذاب 😅 كانو ناس كامل يحبوني كنت عسل نحتارم لكبار او صغار بصح ادا غلط واحد معيا نولي لسقا لساني اكبر مني او على هديك كامل يحبوني الا عمامي لي محملونيش في دم أيا كبرت في وسط عائلة محافظة ولا تقدرو نقولو معقدين او كنت نقرا او حبسوني على قرايتي بعد ماتو والديا او قعدت كي لخدامة عندهم اعملوني اسوء معاملة كرهولي حياتي او منا بدات حكايتي حتا وليت كرهت من هديك المعاملة او او ضرب حتا بديت نتبع في حرام اول حاجة درتها هي شريت تلفون بتخبية او حليت فايس او بديت نتعرف حتا تعرفت على واحد او دخلت معاه في علاقة او وعدني بزواج او غيرو بصح في نهاية حطمني او راح او خلاني او من ثما بدا تغير وليت كل ليلة نتعرف او او نحكي حتا لصباح في تلفون امهيم كل ليلة مع واحد حتا وليت نطلع كنفرونس مع رجال او نحكي نورمال او عجبني الحال او مبعد وليت نطلع في ليل مع رجال امهيم وليت اسوء بنت تشوفها او لحالة غير تطور للقدام او انا غير نزيد نطغى اكثر حتا وليت نخرج بتخبية او نتلقاهم نورمال بصح الحمد الله واحد مقربلي ولا مسني حتا لواحد نهار قررت نخرج نصيد كاش واحد افورني شويا عليا امهيم ديت شويا دراهم معيا او لبست وشعري مطلوق او خرجت لمنطقة بعيدة علينا بزااف بحكم انا في منطقة تعنا اكل اعرفوني بلي عاقلة او متربية او خطيني دك لحوايج أيا كي خرجت رحت منطقة بعيدة علينا او مفيهاش ناسي او قعدت في واحد الجاردة تهبل او نخزر في شكون نصيد حتا جات واحدة قعدت قدامي كانت تهبل مشاء الله او كانت لبسة حجاب شرعي سبحان الله وجه الجنة تهبل قعدت غير نشوف فيها او نقول في قلبي علاه انا...يتبع
#جزء الثاني
ماشي هكا حتا طحتلي الدمعة مسحت الدمعة او نضت من بلاصتي ديركت لحانوت او شريت حجاب شرعي او قلت علاه نبكي انا نقدر نكون هكا لبست او خرجت شابة نهبل هزيت دوزاني او رجعت المنطقة تاعي في البيس او انا رجعا قعد قدامي واحد اهبل اهبل طويل او الكور متحوف او لحيا مرسومة او كان لابس قميص في البيض انور يخرج من وجهو قعدت غير نتأمل فيه بتخبية امهيم طول طريق او هو شاغل بالي حتا وصلت المنطقة كي هبطت هبط موريا مشا شويا موريا او مبعد حبس عند واحد قاعد يحكي معاه او انا كملت طريقي لدار كي دخلت لدار فت نحيت قشي او ديركت لشغل قبل ميرجع عمي او مرتو او تخلا على راسي كملت شغل او فت شمبرتي او انا غير نخمم في هدا الراجل لي شاغل تفكيري امهيم جبت ليل اكل او انا نخمم فيه او معلباليش علاه فاتو عليا رجال بزااف او شابين خير منو بصح منعلقش منعرف علاه هو قعدت نخمم فيه امهيم طبعا صباح نضت لشغل الدار نخدم وجدت لفطور حطيتو فوق طابلة او قعدت نغسل في مواعن او دار عمي يفطرو حتا نسمع في عمي قال لمرتو راح اجي يخطبوني في طفلة يعني بنت عمي او راه لباس عليه لدارو بطونبيل او امام تاع مسجد متربي او متخلق قوليلها توجد روحها شويا هكا جات عندي مرت عمي قاتلي ديري ميناج لدار راهم جاين يخطبو بنت عمك قتلها اوك أيا بديت ندير في شغل او نوجد او كي قربت اجو قالولي ادخلي للشمبرة او متخرجيش دخلت لشمبرتي او قعدت حتا سمعتهم جاو أيا قلت نطل نشوفهم غير من بعيد برك انا كملت او كانت صدفة هداك انسان لي تلقيتو في البيس رجعت للور او سكرت الباب تاع الشمبرة او نضت نبكي مافهمتش علاه بكيت مهيم جاتني دمعة او قاعدة نقول انا عبد منعرفوش ميعرفني علاه نتعلق بيه قعدت غير نخمم هوما راحو او انا خرجت نفضت لحالة او راهم استناو فيه ارجع لخبر بحكم روئية شرعية لغدوة عيطلهم قالهم مكتبش المكتوب شدتني واحد لفرحة متأمنوش امهيم فاتو ليام او انا غير نخمم فيه حتا واحد نهار خرجت نشري شويا حوايج حتا جات طفلة صغيرة عندي مدتلي ورقة انا فتحتها لقيت مكتوب فيها عيطلي نسحقك والله او ادا معجباتكش هدرتي كوبي او نمرو مكتوب في الورقة أيا قلت لمول لحانوت مدلي ستيلو نكتب حاجة او نرجعلك او كتبتلو في ورقة أولا معنديش تلفون ثانية منحكيش مع رجال منعرفهمش ثلاث منحكيش مع واحد مخبي وجه او بعثتلو الورقة او كملت نشري في لحوايج حتا نحس انسان قريب ليا قالي أولا..يتبع
#جزء الثالث
حتا نحس انسان قريب ليا قالي أولا. مخبيتش وجهي منحبش هدرت ناس برك عليا ولا عليك ثنيا دري حل او عيطلي نسحقك او بلا تكسار راس هزيت عينيا او شفت فيه لقتو نفس انسان لي تلقيتو في بيس او نفس لي جا خطب بنت عمي امهيم شريت حوايجي او روحت او لقيت نخمم هدا واش يسحق قلت نعيطلو او نفهم منو سرقت تلفون تاع مرت عمي او عيطتلو بلماسكي قتلو الو قالي سلام عليكم اختي في الله ضحكت او قتلو اختي في الله قالي علاه واش فيها قتلو ولو قتلو ايه فايدة بالحصول واش تحتاج مني اني عيطتلك قالي عجبتني او باغي نخطبك نهار شتك في بيس دخلتي لقلبي ضحكت قتلو وقيلا مكانش عندنا بيبان حتا جاي من تاقة قالي حاشة انا جيت من باب بصح مستقبلتنيش لي انا بغيها قلبي او انا طائرة من فرحة قتلو ملا شكون ستقبلك قالي بنت عمك أمبعد قالي شوفي انا منكثرش معاك الهدرة انا عجبتني او نوي لحلال او جيت لباب دار بصح للأسف او كي سقسيت الناس قالولي عمامك واعرين او باغين غير تزوج بنتهم او غيرها مخيم انا حبيت نسقسيك انت ادا قابلة بيا اني ندير جماعة او نجي او بأذن الله تكوني مرتي بصح ادا قابلة انت او نوعدك نعيشك كي سلطانة قتلو نخمم او نقولك قالي تصبحي بخير اختي في الله قتلو او انت بالغ خير اخي في الله او كملتها بضحكة...يتبع
#جزء الرابع
كوبيت او حكيت راسي على مخدة او انا غير نخمم فيه قعدت يومين على ديك لحالة او مبعد هزيت تلفون او عيطتلو بلماسكي قتلو انا قابلة بصح الصبر شويا عليا حتا نقولك ارواح قالي انا صغير عليك الدنيا اكل ضحكت ضحكة خفيفة او قتلو في أمان الله اخي في الله او كوبيت او انا غير نخمم فيه قعدت على ديك لحالة سمانة حتا لواحد نهار خرجت باه نشري شويا حوايج لقيتو ثماك قالي واش بدلتي رايك مرجعتليش بلخبر قتلو يخي قتلك اصبر قالي بصح فهمني واش راح ديري قتلو والله حابة نفهمك في كلش بصح لغالب منقدرش نحكي برا نخاف من هدرة ناس والله يسمع عمي يذبحني او زيد معنديش تلفون قالي اووي قالي اصبري هنا دقيقة دك نجي راح شويا او رجع عندي كي جا قالي هاكي هدا وين ما افرج ربي قتلو واش هدا قالي تلفون حطبة او فيه لبيست راهي مركبة بعد قالي او نمرو راه عندك ياخي امهيم ديت هديك الساك او رحت لدار او كي وصلت دخلت شمبرتي او فتحت لقيت فيه تلفون بصح ماشي كيما قال هو تلفون حطبة لقيت تلفون ماركة غالية او لقيت مركب فيه ديجا لبيس او لقيت معها مليون او شويا شيكولة او حوايج تاع تبناج او معاهم ورقة مكتوب فيهم بصحة او لهنا او كاش متحتاجي اني هنا او تعيش ازربي افري أمورك باه نجي نخطبك او تكوني حلالي منيش حاب نكون معاك في حرام حاب نكون معاك في الحلال او تلفون مشرتهولكش باه كل وقت نحكي عيطلي كاش متسحقي برك باه اكون تواصل بينتنا برك لغالب بغاك قلبي او معنديش حل آخر انا خطيني سوق هدا بصح هدي هي دنيا قريت الورقة او فتحت تلفون او بعثتلو مساج او قتلو اوك كما تحب او ربي يحفضك على كلش او بأذن الله في اقرب وقت اني ندير حل خبيت لحوايج او خرجت من شمبرتي باه ندير شغل فاتو عشر ايام على ديك لحالة او هو في عقلي نخمم في ليل معا نهار او وصل ليوم الموعود هزيت تلفون او عيطتلو قتلو دير جماعة او رواح بصح بلاك على روحك عمامي راهم واعرين او طبعا دار جماعة او جا او دار حل او درنا غير خطبة بينتنا في جامع او مبعد درنا عرس خفيف فيه غير شويا من لافامي بنسبة ليا لبست روبةاو درلي كورتاج اهبل او شرالي تصديرة او تصدرت محرمني من والو او كان عند كلمتو الحمد الله او دك راني ام اولادو رزقني ربي بزوج توأم محمد الامين او توبة ربي يحفضهم او ربي يحفضهولي او راني نكمل في قرايتي بلمراسلة او جبالي حق والديا لي داوه مني عمامي او حفضني في قران حفضت 47حزب... يتبع
#الاخيرة
قران حفضت 47حزب ان شاء الله نكمل نحفظ 60حزب او راني استاذ قرأن او بشهريتي الحمد الله ربي مفيه غير الخير او نصيحة لبنات اخطيكم من الحكام مهما قصات عليكم دنيا ربي راه يختبر فيك فقط او اعوضك احسن ماكنتي عليه او ادا معوضكش في دنيا اعوضك في اخرا 👌💌النهاية💓